Mat 20 | MED | STEP | Muⱡ ila tᵾpa mumuk rui uⱡ ei, ya uⱡ ei mel. Wu Nuim ti, elim nga wain pana ei, kongun indeing nimba, ipri unt ekit mba, wu mat kurpa purum.

Matthew 20

Wain Pana Ila Kongun Wu Mbᵾ

1 Muⱡ ila tᵾpa mumuk rui uⱡ ei, ya uⱡ ei mel. Wu Nuim ti, elim nga wain pana ei, kongun indeing nimba, ipri unt ekit mba, wu mat kurpa purum. 2 Mba kandpa titim wu mbᵾ, ku moni ruri tenda ei mel, ant tenda ila nguimp nitim ila, kapⱡa nilingina, tᵾpa wain pana ila kongun itᵾi nimba tᵾpa mundrum. 3 Wote ant omba, 9 kilok ei oⱡa elinga kᵾn, wu nuim mba aldpa mba mel rop kona ila wu kat kai kandᵾk morung ila kandpa nimba mel, ‘Enim puk na nga wain pana ila kongun indeing pᵾi! Enim ku moni mat, kongun eng ei mel kapⱡa kapⱡa etᵾp nguimp,’ nitim. Ni kᵾn, wain pana ila puk kongun endᵾtᵾng. 5 Wote, rᵾnggilmᵾ 12 kilok elinga kᵾn, wu mat i ku etpa kandpa tᵾpa, kongun ila tᵾpa mundrum. Wote ant ei mana mba, 3 kilok elinga, wu mat ku kandpa tᵾpa, kongun ila tᵾpa mundrum. 6 Wote akil tepa, ant ei mana mba, 5 kilok elinga kᵾn, wu kai kandᵾk morung kat kᵾⱡ, kundpa nimba mel, ‘Enim nambuⱡ emel, kai kandᵾk moⱡina, kona rumbᵾⱡ romba enim?’ nimba wuldᵾtᵾm. 7 Wote, wu ni kᵾⱡ ndi, nᵾk mel, ‘Tᵾn wamp ti ndi, kongun iteing wᵾi ni nanim,’ nᵾtᵾng, ‘I ndam, enim puk, na nga wain pana ila kongun iteing pᵾi ku!’ nitim.

8 “Kona rumbᵾⱡ romba itim ni kᵾn, wain pana puⱡ wu ni ndi, kongun rᵾp wu ni, kundpa nimba mel, ‘Kongun wu mbᵾ, wi rokᵾn moni ngui! Akil tek ok, kongun eng wu mbᵾ, moni kuimp tekᵾn ngukᵾn, wote kongun kuimp tek ok eng mbᵾ, moni akil tekᵾn ngui!’ nitim. 9 Ni kᵾn, mel ant ei mana puⱡnga, kongun etᵾng wu nimbᵾ, ku moni ruri tenda nᵾk tᵾtᵾng. 10 Wote, kongun ipri unt ok etᵾng nimbᵾ, en enim moni minal mel timin nda nᵾk pilik morung. Ni wote, ku moni ruri tenda nimba ngurum. 11 Ku moni ni kᵾⱡ tᵾk, wain pana puⱡ wu ni kᵾn, numan rukᵾr ik mura etᵾk nᵾk mel, ‘Wu akil tek kongun rung tilinga ong kᵾⱡ, ant mong tenda mendpᵾⱡ kongun eng. Wote, tᵾn ipri unt ombun etᵾp moⱡmina, wote ant ndi, tᵾn nom uⱡ ei, kandkᵾn kelkᵾn, wote ku moni ruri tenda nᵾkᵾn ei, ngun ei ka?’ nᵾtᵾng. 13 Pana puⱡ wu ni ndi, wu ti ni, kundpa nimba mel, “Ang ye! Na ndi, nim tᵾp wᵾlᵾ mundᵾp uⱡ ti iti nᵾtᵾnt. Nim ant tenda ila, ku ruri tenda nguimp nᵾnt ei, kapⱡa nᵾkᵾn nim ok, kongun in ni ka! 14 Nim nga ku tin ei mel, tin ei kᵾn, mekᵾn mang kona pi! Ya wu ant ei, mana pᵾng omba, kongun em wu ni, nim ngont ku peng ni mel ku nguimp. 15 Ku nanim nga mbᵾ ndi, nanim kᵾmp tᵾp, itimp nᵾmp pint mbᵾ mel, iti nᵾtᵾmp ye? Muna, nim wu kᵾⱡ kᵾn, ku moni kapⱡa etᵾp ngont ei nga wᵾlᵾk ron ei?” nitim. 16 Wote Jisas ndi, ik ek kᵾⱡ ropa pora ndupa nimba mel, “Akil teng wamp mbᵾ ok, kuimbal ping, wote kuimbal moⱡᵾng wamp mbᵾ ok, akil ting,” nitim.

Jisas Elim Koⱡmba. Ei Nga Nimba Raldika Inditim.

17 Wote Jisas kᵾn, elim nga kitip kᵾni wu ni kᵾⱡ kᵾn, wi Jerusalem mbin nᵾk puk, nombuⱡa rᵾk tᵾngᵾn ila, Jisas ndi, wu kᵾⱡ ekit tᵾpa ndenga nimba, kundpa nimba mel, “Pilik kun tᵾi! Tᵾn wi Jerusa-lem punmᵾn ila, Muⱡᵾl Muⱡᵾl Wu Kupa ei, imp molk tᵾk, pris wu kuimbal kᵾⱡ kᵾn, mi ik mbo wu kᵾⱡ kᵾn nguing. Wu kᵾⱡ ndi, wu ei punt wu nᵾk, rok kundᵾi nᵾk, tᵾk mek puk wu rᵾⱡaip elpa kat ngangina, kan ngᵾk tᵾk ik kuldᵾk, tᵾmbᵾⱡ rok tᵾk, nde peta ila nil rok pindangina, pepa koⱡmba. Wote, rumbᵾⱡ raldika omba pangga, ⱡoporpa tᵾpa oⱡa mondᵾmba,” nitim.

Wu Jeims, Jon Raⱡ Nga Mam Ei Ndi, Jisas Kᵾn Mel Mawa Itim

20 Wu Sepeti ambᵾm ni, elim nga kangᵾm raⱡ mepa omba, Jisas murum nila, mura ropa mondpa mel ti, mawa etmba itim. 21 Wote Jisas ndi, “Nim namba mel ei, numan ngun?” nimba wuldᵾtᵾm. Amp ni ndi, punt ropa nimba mel, “Nim nga tᵾpa mumuk rui kona ila nim wu nuim mᵾn ei kᵾn, na nga kang wu raⱡ nga ti tᵾkᵾn, ki mbo orunga mondkᵾn, ti tᵾkᵾn, ki rar orunga mundimp nᵾn nᵾmp ont,” nitim. 22 Jisas ndi, punt ropa nimba mel, “Nim mawa etkᵾn nᵾn ik ei, pilkᵾn kun iti natᵾk ninmin. Na mindil nu nuimp ent nu ming tenda ila, kapⱡa enim kapⱡa nuing ei?” nimba wuldᵾtᵾm. Wote, punt rokᵾⱡ nᵾkᵾⱡ mel, “Tᵾl kapⱡa nuimbil,” nᵾtᵾnggil. 23 Wote Jisas ndi, kundpa nimba mel, “Enmbil na nᵾnt nu ming tenda ila kapⱡa nuinggil mint. Wote nam ti, na nga ki mbo orunga muna, rar orunga moⱡmba ei na ndi, nimp mel kapⱡa mon. Kona raⱡ na nga Wuta ei ndi, to ropa titim wamp mbᵾ nga kona tetᵾm,” nitim.

24 Wote, wu raⱡ nga ik nᵾtᵾnggil ni, kitip kᵾni wu 10 kat ndi, pilik popᵾⱡ kurung. 25 Wu kᵾⱡ popᵾⱡ kurung uⱡ ei, Jisas ndi, kandpa, wu ni kᵾⱡ pᵾkᵾ, wi ropa rukᵾr tᵾpa, nimba mel, “Enim pilik mormin ei, mbo wu nuim mbo wamp mbᵾ, ou kel mbᵾ ambulk, oⱡa mana etᵾk, wote en enim oⱡa mel puk wamp mbᵾ ndi, en enim nga ik mbᵾ teng ndeing nᵾtmin. 26 Uⱡ ei mel, enim kᵾn pi nᵾpangga! Enim nga ruⱡ ila wu ti, nuim muⱡimp nimba pilim ndam, enim nga kindmant wamp mel muⱡangga! 27 Ei kᵾn, enim kᵾn kuimbal muⱡimp nimba pilim wu ei, enim nga kindmant wamp kurpa raⱡpa muⱡangga! 28 Ei nambuⱡ emel, Muⱡᵾl Muⱡᵾl Wu Kupa ei ndi, enim tᵾpa kindmant wamp rundi nandᵾmba mon. Enim nga kindmant endpa, elim nga kont mba mul uⱡ ei, wak ropa, wamp minal etpa tᵾmba, pilpa mana urum ei mel, enim i ku itᵾi,” nitim.

Jisas Ndi, Wu Mong Ti Raⱡ Etpa Titim

29 Wote Jisas kᵾn, elim nga kitip kᵾni wu ni kᵾⱡ kᵾn, Jeriko wak rok kelik ping oⱡina, wamp minal Jisas pep rok, akil tek orung. 30 Wu mong ti raⱡ, nombuⱡa ᵾldᵾ ila molkᵾⱡ pᵾtᵾnggil mel, Jisas ni omba punum nᵾtᵾng ila, wi rokᵾⱡ nᵾkᵾⱡ mel, “Wu Nuim ye! Depit nga kangᵾm. Tᵾl kont kun ka!” nᵾtᵾnggil. 31 Wote, wamp nimbᵾ ndi, ik ngᵾk, raka ni kᵾⱡ moⱡᵾnggil ka nᵾtᵾng ni, pilik kelkᵾⱡ wi oⱡa ndukᵾⱡ, rokᵾⱡ nᵾkᵾⱡ mel, “Depit nga kangᵾm wu Nuim ye! Tᵾl kont kun ka!” nᵾtᵾnggil. 32 Jisas ndi, nombuⱡa ila anggilpa, wu raⱡ waldpa nimba mel, “Na ndi, enmbil etᵾp iteimp nᵾk, nᵾnmbil mel nant?” nitim. 33 Wote, wu raⱡ ndi, punt rokᵾⱡ nᵾkᵾⱡ mel, “Nuim ye! Tᵾl nga mong raⱡ etkᵾn, piral ndun nᵾmp nᵾnmbᵾⱡ ei ka!” nᵾtᵾnggil. 34 Ni kᵾn, Jisas ndi, wu raⱡ kandpa kont elinga, wu raⱡ nga mong ila ambuⱡnga, tᵾngᵾnda mint piral nilinga, kona kandkᵾⱡ, Jisas purum mel, pep rokᵾⱡ purᵾnggil.